တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သည့် မြန်မာ့တပ်မတော် ချစ်ကြည်ရေးကိုယ်စားလှယ်အဖွဲ့ ရှန်ကျန်းမြို့ရှိ Shenzhen Lotus Hill Park နှင့် Shenzhen Museum သို့သွားရောက်ကြည့်ရှုလေ့လာ

(Unicode Version)

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်သည့် မြန်မာ့တပ်မတော် ချစ်ကြည်ရေးကိုယ်စားလှယ်အဖွဲ့ ရှန်ကျန်းမြို့ရှိ Shenzhen Lotus Hill Park နှင့် Shenzhen Museum သို့သွားရောက်ကြည့်ရှုလေ့လာ

နေပြည်တော်၊ နို၀င်ဘာ – ၂၆

တရုတ်ပြည်သူ့သမ္မတနိုင်ငံ၊ ကွမ်ကျိုးမြို့တွင် ချစ်ကြည်ရေးခရီးရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် သည် ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ တရုတ်နိုင်ငံဆိုင်ရာ မြန်မာနိုင်ငံသံအမတ်ကြီး ဦးသစ်လင်းအုန်း၊ မြန်မာစစ်သံ(ကြည်း၊ရေ၊လေ) ဗိုလ်မှူးချုပ်တင့်ဆန်းတို့လိုက်ပါပြီး နို၀င်ဘာ ၂၅ ရက် မွန်းလွဲပိုင်းတွင် ကွမ်ကျိုးဘူတာမှတစ်ဆင့် ရှန်ကျန်းဘူတာသို့ ကျည်ဆန်ရထားဖြင့် လိုက်ပါစီးနင်းလေ့လာကြသည်။

ထို့နောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် ရှန်ကျန်းမြို့ရှိ Lotus Hill Park အတွင်း လှည့်လည်ကြည့်ရှုလေ့လာပြီး ရှန်ကျန်းမြို့၏ ရှုခင်းအားကြည့် ရှုလေ့လာကြသည်။ ယင်းနောက် Lotus Hill Park အတွင်းရှိ ခေါင်းဆောင်ကြီး တိန့်ရှောင်ဖိန်ပုံတူအမှတ်တရရုပ်တုရှေ့တွင် စုပေါင်းဓာတ်ပုံ ရိုက်ကြသည်။

အဆိုပါ Shenzhen Lotus Hill Park တွင် စတုရန်း မီတာ ၈၀၀၀၀ ခန့် ကျယ်ဝန်းပြီး လှပသည့်အပူပိုင်းဇုန်နှင့် အပူလျော့ပိုင်းဇုန်သဘာဝရှုခင်းများနှင့် အုန်းပင်သစ်တောများ ပေါက်ရောက် လျက်ရှိပြီး ၎င်းနေရာသို့ လာရောက်လည်ပတ်သူများ ဖြင့်စည်ကားလျက်ရှိကြောင်း သိရှိရသည်။

၎င်းနောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် Shenzhen Museum သို့ ရောက်ရှိကြပြီး ပြတိုက်အတွင်းပြသထားသည့် ရှန်ကျန်းမြို့ဖွံ့ဖြိုးတိုးတက်လာ မှုအဆင့်ဆင့်ပြခန်းများအား လှည့်လည်ကြည့်ရှုလေ့လာကြရာ တာဝန်ရှိသူများကလိုက်လံ ရှင်းလင်းပြသကြသည်။ ထို့နောက် တပ်မတော်ကာကွယ်ရေးဦးစီးချုပ်သည် ပြတိုက်ရှိ ဧည့်သည်တော်မှတ်တမ်းစာအုပ်တွင် လက်မှတ်ရေးထိုးသည်။

အဆိုပါ Shenzhen Museum တွင် ရှန်ကျန်းမြို့တည်ဆောက်မှုမှတ်တမ်းများနှင့် ဖွံ့ဖြိုးတိုးတက်လာမှုအခြေအနေများ၊ ရှန်ကျန်းမြို့မှထုတ်လုပ်သည့် စက်မှုထုတ်ကုန်ပစ္စည်းများအား ကဏ္ဍအလိုက်ခင်းကျင်းပြသထားသည်။